काठमाडौं । पछिल्लो समय मोडल तथा कलाकार पल शाह फिल्ममा भन्दा बढी म्युजिक भिडियोमा देखिएका छन् । म्युजिक भिडियोमा उनको राम्रो माग छ । पलले अभिनय गरेका म्युजिक भिडियोहरुले चर्चा पनि कमाउने गर्छन् । अर्कातिर म्युजिक भिडियोबाट छोटो समयमै राम्रै आम्दानी हुने भएकाले पनि कलाकारहरु यतातिर होमिने गर्छन् ।
आजभोलि भने पल शाह सामाजिक कार्यमा पनि उत्तिकै सक्रिय बनेका छन् । लकडाउन शुरु भएसँगै पलले समस्यामा परेका चलचित्र प्राविधिकहरुको सहयोगार्थ रुपैयाँ ५ लाख दिएका थिए । प्राविधिक समस्यामा परेका बेला उनले गरेको सहयोगले राहत पुगेको थियो ।
यसैबीच पल यतिबेला कालीकोटतिर लागेका छन् । उनले सामाजिक सञ्जालमार्फत ‘यात्रा कालीकोटको’ भन्दै तस्वीर शेयर गरेका छन् । उनी कालीकोट कुनै म्युजिक भिडियोको छायांकनका लागि नभएर यसै साता गएको बाढी र पहिरोपीडितलाई राहत बाँड्न जान लागेका हुन् ।
उनी आफूले दर्ता गराएको पल शाह प्रतिष्ठान र हाम्रो टिम नेपालको सहकार्यमा राहत बाँड्न जान लागेका हुन् । पलले बाढीपहिरोले समस्यामा पारेका ४० घरलाई लत्ताकपडा र खाद्यान्न सामग्री वितरण गर्ने बताएका छन् ।
