इलाम– हिमालयन टेलिभिजनबाट प्रसारण हुने ‘द भ्वाइस अफ् नेपाल सिजन–५’ को फाइनल पुगेका इलामको फाकफोकथुम गाउँपालिका–५, लुम्देका विनोद राईलाई जिताउन इलामबासी सक्रिय भएका छन् ।
राईलाई जिताउन भोटका लागि आग्रह गर्दै संगीतप्रेमी युवा जिल्लाका विभिन्न स्थानीय तहसम्म प्रचार–प्रसार गरिरहेका छन् । विनोदलाई फाइनल जिताउन उनको घर रहेको फाकफोकथुम गाउँपालिकादेखि माइजोगमाई, सूर्योदय, माई नगरपालिकालगायत स्थानमा प्रचारप्रसार तीव्र बनाइएको छ ।
जिल्ला सदरमुकाम इलाममा पनि उनको प्रचारका लागि युवाहरू जुटेका छन् । ‘इलामे छोरालाई भ्वाइस् अफ् नेपाल सिजन–५ को उपाधि जिताउन हामी प्रयास गरिरहेका छौं,’ माङ्सेबुङ गाउँपालिकाका अतित योङहाङले भने, ‘उनलाई भोट दिएर जिताउन सबैमा आग्रह छ ।’
गायक राजेश चाम्लिङदेखि विभिन्न कलाकारसमेत विनोदलाई जिताउन लागिपरेका छन् । जिल्लाका कलाकारमात्र नभई सबै क्षेत्रका युवा विनोदलाई भोट माग्दै अभियान चलाइरहेका छन् ।
इलामको फाकफोकथुम–५, लुम्दे घर भएका ‘द भ्वाइस अफ् नेपाल सिजन–५’ का फाइनलिस्ट विनोद राईले गृहजिल्लामा सांगीतिक प्रस्तुति दिएका छन् ।
इलाम चोक बजारमा उनले आधा दर्जन गीत गाएर इलामे दर्शक–स्रोतालाई मन्त्रमुग्ध बनाए ।
उनले इलामबासीलाई आफूलाई भोट गरी फाइनलमा विजयी गराउन पनि आग्रह गरे । ‘तपाइँहरूको साथ र सहयोग रह्यो भने फाइनल उपाधि यसपटक इलामले ल्याउने छ,’ उनले भने, ‘आउँदो शुक्रबारसम्म भोट गर्ने समय छ, तपाइँहरूमा मलाई पूर्ण विश्वास छ ।’
उनलाई जिताउन इलामबासीले पनि साथ र सहयोग गर्ने ‘हुटिङ’ दिए ।
फाइनलका चार प्रतिस्पर्धीमध्येमा परेका विनोद इलामका उदीयमान संगीत प्रतिभा हुन् ।
फाइनलका प्रतिस्पर्धी टुंगो लागेपछि प्रतिस्पर्धीका लागि भोटिङ खुला भएको छ ।
विनोद टिम मिलन नेवारबाट फाइनल पुगेका हुन् ।
टिम राजेशपायल राईको समूहबाट मकर योञ्जन फाइनल पुगेका छन् । टिम प्रमोद खरेलबाट नोगेन लिम्बू र टिम उदय सोताङबाट कुमार प्रयास राई फाइनलिस्ट बनेका छन् ।
